Google ad மூலம் Mac லாக் ஆகுதா? Tech support scam-லிருந்து தப்பிக்க என்ன செய்யணும்?

விண்டோஸ் மற்றும் மேக் கணினிகளின் திரைகளை முடக்கி, போலி உதவி மையத்தை உடனடியாகத் தொடர்பு கொள்ளுமாறு அச்சுறுத்தும் செய்திகளைக் காட்டும் அதிநவீன தொழில்நுட்ப உதவி மோசடி விளம்பரங்களை Google-ல் ஆராய்ச்சியாளர்கள் சமீபத்தில் கண்டறிந்துள்ளனர்.

இந்த விளம்பரங்கள் மேப்ஸ், வானிலை, மனை விற்பனை, ஆவணப் பகிர்வு மற்றும் விளையாட்டுத் தளங்கள் உள்ளிட்ட பல பிரபல இணையதளங்களில் காட்டப்பட்டன. அந்த எண்ணிற்குத் தொடர்புகொண்ட பயனர்களை, அதிக கட்டணம் செலுத்தச் சொல்லியோ, தொலைதூரத்திலிருந்து அவர்களின் சாதனத்தை இயக்க அனுமதி (remote access) தரச் சொல்லியோ அல்லது தனிப்பட்ட தகவல்களைத் தரச் சொல்லியோ மிரட்டியுள்ளனர். ஆகஸ்ட் 31 முதல் செப்டம்பர் 14 வரை, 619 வாடிக்கையாளர் நிறுவனங்களைச் சேர்ந்த பயனர்கள் இந்த மோசடி விளம்பரங்களை க்ளிக் செய்துள்ளதாக Netskope பாதுகாப்பு நிறுவனம் கண்டறிந்துள்ளது. இருப்பினும், Netskope நிறுவனம் அந்தத் தீங்கிழைக்கும் உள்ளடக்கத்தைத் தடுத்துவிட்டதால், அவர்களில் யாருக்கும் எந்தப் பாதிப்பும் ஏற்படவில்லை.

பாதிக்கப்பட்ட நிறுவனங்களில் சுமார் 62 சதவீதம் அமெரிக்காவைச் சேர்ந்தவை. ஜப்பான் மற்றும் ஆஸ்திரேலியா முறையே இரண்டு மற்றும் மூன்றாவது இடங்களில் உள்ளன. இணைய நடவடிக்கைகளில் ஒரு சிறிய பகுதியை மட்டுமே இந்த நிறுவனத்தால் கண்காணிக்க முடிந்ததால், இந்த விளம்பரங்களைப் பார்த்தவர்கள் மற்றும் ஏமாந்தவர்களின் உண்மையான எண்ணிக்கை இதைவிட மிக அதிகமாக இருக்க வாய்ப்புள்ளது. குறைந்தது 284 புகழ்பெற்ற வலைத்தளங்களில், 250-க்கும் மேற்பட்ட Google Ads பிரச்சார ஐடிக்களை (Campaign IDs) Netskope நிறுவனம் கண்டறிந்துள்ளது.